Mikabat sa gibana-bana nga 7.3 milyon nga mga deboto ang partisipante sa malampusong Traslacion 2026 sa Itom nga Nazareno. Base sa pinakaulahing datos gikan sa kagamhanan sa Manila, kining maong gidaghanon nagpakita sa padayong lawom nga pagtuo sa mga Pilipino bisan pa man sa ka-init ug kahuot sa katawhan sa kadalanan sa Manila.
Gawas sa minilyon nga misalmot, gikataho usab sa National Capital Region Police Office (NCRPO) nga adunay duha ka deboto ang nakabsan sa kinabuhi atol sa maong tinuig nga prosesyon. Bisan pa man sa maong trahedya, gihulagway sa mga awtoridad nga generally peaceful o malinawon sa katibuk-an ang dagan sa selebrasyon.
Samtang human sa kapin 30 ka oras ug 35 ka minuto, hingpit na nga nakabalik ang imahe sa Itom nga Nazareno sa Minor Basilica sa Quiapo. Sumala ni Fr. Ramon Jade Licuanan, ang rektor ug kura paroko sa Minor Basilica ug National Shrine sa Jesus Nazareno, kadiyot lamang ang pagpabilin sa andas sa maong simbahan. Giingon nga kini ang labing unang higayon nga nahitabo ang pagpabilin sa mga andas sa maong dapit.
Kini giila na karon nga pinakataas nga Traslacion sa kasaysayan sukad kini gisugdan, diin gipakita sa mga deboto ang ilang walay pag-atras nga paningkamot ug debosyon bisan pa man sa kakapoy ug kahuot sa katawhan.
Ang maong record nagmatuod sa dili matigulang nga hugot nga pagtuo sa mga Pilipino ngadto sa Mahal nga Poong Nazareno.