Gipasalig sa Land Transportation Franchising and Regulatory Board (LTFRB)-10 nga nagpabiling hapsay ug normal ang dagan sa pampublikong transportasyon sa tibuok Northern Mindanao ubos sa “Oplan Semana Santa.”
Sa pakighinabi sa Bombo Radyo Malaybalay kay Regional Director Abner Joseph Aljo R. Bendijo, sa Land Transportation Franchising and Regulatory Board, Region-X, na matod pa wala sila’y nadawat nga mga reklamo kalambigit sa kakulang sa biyahe, mga stranded nga pasahero, o ilegal nga pagsaka sa pletehan sa tibuok rehiyon. Sa gihimong inspeksyon sa mga nag-unang terminal sa Region 10, nasuta ni Bendijo nga walay nahitabong overcharging ug nagpabiling suspendido ang bisan unsang provisional fare increase.
Gipasabot sa opisyal nga ang bisan unsang dugang nga bayad sa pletehan kinahanglan nga boluntaryo lamang gikan sa pasahero ug dili pinugos sa mga drayber o operator. Gipasiugda niya nga kalapasan sa balaod ang pagpugos og dugang plete samtang wala pa’y bag-ong fare matrix. Giawhag usab ang mga commuters nga magsang-at og pormal nga reklamo kon duna’y makasinati og pagpangabuso sa pletehan.
Sa katapusan, mihangyo ang LTFRB-10 og dugang pagsabot sa mga pasahero tungod sa posibleng kalangan sa biyahe, ilabina sa mga bus nga nagpaabot nga mapuno sa dili pa mobiya sa terminal. Gipaniguro usab sa ahensya nga walay mahitabong umento sa pamasahi samtang epektibo pa ang kasamtangang fare suspension.