Gihulat sa transport sector sa Northern Mindanao ang pag-release sa fuel subsidy samtang suspendido ang fare hike sumala sa direktiba sa administrasyon ni Pangulong Ferdinand Marcos Jr. Sa pakighinabi sa Bombo Radyo Mlaybalay kay LTFRB Region 10 Director Alexes Joseph Aljo Bendijo, hulat pa ang rehiyon sa pag-download sa fuel subsidy gikan sa central office samtang giuna ang paghatag sa ayuda nga AICS pinaagi sa DSWD.
Kapin sa 4,600 ka PUJ drivers ug operators ang nalista nga benepisyaryo, samtang padayon pa ang pag-validate sa mga taxi drivers. Ang matag benepisyaryo sa AICS makadawat og ₱5,000 nga ayuda, lahi pa sa fuel subsidy nga ipagawas pa.
Gipasabot usab ni Bendijo nga temporaryo lamang ang suspensyon sa fare hike aron malikayan ang dugang kabug-at sa mga commuter ug posibleng epekto sa inflation, samtang padayon ang pagtuon niini sa LTFRB.
Sa laing bahin, iyang gihangyo ang transport groups nga likayan ang transport strike ug magpadayon sa dayalogo, samtang nagpabiling abli ang ilang opisina alang sa tanang stakeholders.