Gitukod na ang mga police tracker teams alang sa manhunt operations batok sa kanhi Ako Bicol Party-list Representative Zaldy Co ug sa 17 pa ka indibidwal, pagkahuman ipagula kagahapong adlawa ang mga warrant of arrest batok kanila. Kini gi-kompirma ni Department of Interior and Local Government (DILG) Secretary Juanito Victor “Jonvic” Remulla.
Sa usa ka interbyu, gibutyag ni Remulla nga kasamtangang gipangbisita sa mga tracker teams ang mga lokasyon sa mga akusado, lakip na ang ilang mga puloy-anan ug ubang address, aron masiguro nga maipatuman ang mga warrant of arrest.
Gipasabot sa opisyal nga kini nga lakang giandam aron mapadali ang pagkasikop sa mga personalidad nga nalambigit sa maanomaliyang flood control projects sa nasod. Bisan tuod wala pa’y detalye kung pila ka grupo ang nagapangita ug diin sila nag-operate, gisaad ni Remulla nga kini nga lakang makapadali sa pagkahuman sa imbestigasyon ug sa pagdakop sa mga akusado.
Ang tracker teams gitukod pa sa Martes ug giandam nga bisan unsang orasa posibleng adunay mga matultolan nga mga indibidwal nga nalambigit sa korapsyon.