Miingon ang usa ka pribadong empleyada nga kaya usab sa kababayen-an ang mga trabahong kasagarang ginahimo sa kalalakin-an, samtang gidasig niini ang mga babae nga magtrabaho aron makatabang sa pamilya ilabina sa karong dili masiguro nga kahimtang sa ekonomiya.
Sa Pakighinabi sa Bombo Radyo Malaybalay sa programang Goodmorning Philippines alang usab sa pagselebrar sa usa ka Womens day, matud ni Julieta Cagampang, usa ka private employee, importante nga adunay kaugalingong trabaho ug kita ang kababayen-an aron makatabang sa galastuhon sa pamilya ug sa edukasyon sa mga igsoon niini.
Gibutyag niini nga sukad sa iyang pag-graduate nakatrabaho na siya sa tulo ka kompanya ug kapin na sa usa ka tuig sa iyang kasamtangang trabaho isip promodiser sa mall, diin kadaghanan sa iyang kauban sa trabaho mga lalaki.
Bisan giingong pang-lalaki ang maong trabaho, giingon ni Cagampang nga napamatud-an niya nga kaya usab kini sa babaye ug usahay mas maayo pa ang mahimo niini.
Alang kaniya, ang pagtrabaho sa babaye dili lamang pag-angkon og kaugalingong kita kundili usa usab ka paagi aron mapakita nga parehas nga adunay kakayahan ang kababayen-an ug kalalakin-an sa trabaho.