Sa unang higayon karong season, nakuha sa top NBA team nga Oklahoma City Thunder ang kadaugan batok sa ilang karibal nga San Antonio Spurs.
Kahinumduman nga nakuha sa Spurs ang daug sa unang tulo nila ka engkwentro batok sa OKC, apan sa ikaupat nga pag-atbang nila sa defending champion, nipatigbabaw ang Thunder sa iskor nga 119-98.
Nanguna sa maong kadaugan ang NBA Finals MVP nga si Shai Gilgeous-Alexander human kini mitala og 11 ka field goals. Sa kinatibuk-an, nakatigom siya og 34 puntos, lakip na ang 11 ka free throws.
Niamot sab og 20 puntos ug duha ka steal ang ikaduhang scorer sa team nga si Jalen Williams. Sa bahin sa Spurs, nalimitahan lang sa 17 puntos ang ilang bigman nga si Victor Wembanyama ug wala kaayo mapakita ang iyang naandan nga “two-way play.”
Nausik usab ang impresibong performance sa guard nga si Stephon Castle nga nakamugna og 20 puntos, pito ka rebounds, walo ka assists, ug usa ka steal.
Ang duha ka magkaribal nga team mao karon ang nanguna sa Western Conference, diin ang Thunder naghupot og 34 ka daog samtang niabot na sa 27 ka daog ang Spurs.