Gipahugtan sa Traffic Management Center (TMC) sa Malaybalay City ang traffic management plan alang sa umaabot nga NMRAA 2026 ug opening sa Kaamulan Festival aron masiguro ang hapsay nga dagan sa trapiko ug malikayan ang kasamok sa dalan panahon sa mga dagkong kalihokan sa probinsya.
Sa pakighinabi sa Bombo Radyo Malaybalay kayi Traffic Operations Officer 1 Justino Roy B. Santonino, magpatuman ang TMC og one-way traffic scheme sulod sa Bukidnon Sports Complex, diin ang mga sakyanan nga gikan sa north o Cagayan de Oro side mosulod sa unang gate ug mogawas sa ikaduhang gate.
Nag-andam usab og parking area nga makaserbisyo sa kapin 1,200 ka sakyanan ug 90 ka slots alang sa VIP, samtang magdeploy og mga personnel sa entrance, exit ug sulod sa complex aron mo-assist sa trapiko ug pedestrian.
Dugang pa niini nga walay ipatuman nga traffic rerouting, apan nakig-coordinate ang TMC sa BPSO aron motabang sa pagdumala sa posibleng choking point sa San Jose area ug pagpatuman sa no-parking policy sa pipila ka lugar duol sa Provincial Capitol panahon sa Kaamulan.
Samtang ang mga bisita sa nagkaduol nga festival gitudloan sa paggamit sa mga parking area sa luyo sa Centennial Stage, padulong sa Hall of Justice ug Kaamulan Open Theater aron mapadayon ang hapsay nga dagan sa trapiko sa dakbayan.