Gipasabot sa Tindig Pilipinas nganong ilang giatras ang ikaduhang impeachment complaint batok kang Bise Presidente Sara Duterte.
Sumala sa maong civil society group nga naghimo sa ikaduhang impeachment complaint, nga ilang ihatag ang ilang tibuok suporta sa ikatulong impeachment complaint nga gisang-at sa mga religious group, pari, ug abogado.
Ang ikaduhang impeachment complaint gisang-at niadtong Pebrero 2 ni Tindig Pilipinas convenor Kiko Aquino Dee, kanhing presidential peace process adviser Ging Deles, Father Flavie Villanueva, ug uban pa. Gisuportahan kini ni ML Party-list Representative Leila de Lima ug Akbayan Representative Percy Cendaña.
Giakusahan sa Tindig Pilipinas ug uban pang complainant si Duterte sa paglapas sa Konstitusyon, graft and corruption, pagpanuhol, pagkahuptan og dili mapasabot nga mga bahandi, gross incompetence ug abuse of power, ug pagpasagad sa extrajudicial killings.
Pormal nga ihatag sa Tindig Pilipinas ang ilang pag-atras sa reklamo sa karong Lunes, Marso 2.
Ang ikatulong impeachment complaint nga gisang-at niadtong Pebrero 9 sa mga religious group, pari, ug abogado, nag-akusar kang Duterte sa betrayal of public trust ug graft and corruption bahin sa giingong sayop nga paggamit sa dili moubos sa ₱612 milyong confidential funds.
Kung mapamatud-an nga igo ang sulod sa reklamo, pahibaloan sa House Committee on Justice ang Bise Presidente ug hatagan siya og 10 ka adlaw aron magsumite sa iyang tubag.
Pagkahuman, adunay tulo ka adlaw ang mga complainant aron motubag, ug tulo ka adlaw usab ang respondent aron magsumite sa rejoinder.
Human niini, moboto ang komite kung adunay probable cause, nga nagkinahanglan og mayoryang boto sa tanang miyembro.
Kung dili moubos sa one third sa mga miyembro sa Kamara ang moboto aron pagtibayin ang report sa komite sa plenaryo, isumite ang Articles of Impeachment sa Senado para sa paglitis.