Nagpadayag sa pagkadismaya ang pipila ka transport groups, lakip na ang grupong PISTON human gibawi ni Pres. Ferdinand Marcos Jr. ang dugang usbaw sa pletehan sa pampublikong sakayanan.
Subay niini, nagpahigayon karong adlawa ang maong grupo lakip na ang pipila ka mga driver og usa ka protesta.
Matod pa ni PISTON National President Modesto “Mody” Floranda, taliwala sa gamay nga usbaw sa pletehan, gibawi pa kini sa Presidente, samtang ang mga dagkong kompanya sa lana, gitugotan sa kagamhanan nga magsige og pasaka sa presyo sa mga produkto.
Tungod niini, gipadayon sa maong grupo ang ilang giandam nga “tigil-pasada” protesta alang sa walay hunong nga pagsaka sa presyo sa produktong petrolyo.
Sa laing bahin, gibutayag ni Senador Imee Marcos nga walay igong koordinasyon ang administrasyon subay walay klaro nga mga desisyon.
Gikuwestyon sa senador kon wala ba kini “Group Chat” o GC ang mga opisyal sa kagamhanan aron magkasinabot una sa mga polisiya sa dili pa kini ipagawas sa publiko.
Kahinumduman nga gipahibawo ni Presidente Marcos Jr. nga suspendido una ang fare hike nga una nang gianunsyo sa Department of Transportation (DOTr) ug Land Transportation Franchising and Regulatory Board (LTFRB).