Gipasabot ni Provincial Events Committee Chair Jun Cruz nga dili tinuod ang mga naglutaw nga isyu sa social media nga wala kunoy booth alang sa mga tribong Lumad sa umaabot nga Kaamulan Festival 2026 sa Malaybalay City, Bukidnon.
Sumala kang Cruz, adunay gigahin nga usa ka dako nga pavilion nga adunay dibisyon alang sa matag usa sa pito ka tribo sa probinsya aron makapakita sa ilang kultura ug makabaligya sa ilang mga produkto. Dugang niini, adunay usab booth ang National Commission on Indigenous Peoples o NCIP alang sa mga lumad nga partisipante.
Gibutyag usab ni Cruz nga kapin sa 250 ka booths ang giandam alang sa festival bisan pa nga miabot sa 2,000 ngadto sa 3,000 ka aplikante ang gustong mahimong concessionaire, busa gipahigayon ang raffle system aron patas nga mapili ang mga makakuha og pwesto. Gikinahanglan usab sa mga aplikante ang mayor’s permit, business permit, sanitary permit ug health ID, ilabi na sa mga nagbaligya og pagkaon.
Matud pa ni Cruz nga 98% ngadto sa 99% sa mga concessionaires karon mga lokal gikan sa Bukidnon ug giuna gayud ang mga taga-probinsya sa pag-apil sa kalihokan.
Sa laing bahin, giingon ni Cruz nga 98% ngadto sa 99% na usab ang kaandaman sa probinsya alang sa festival nga opisyal nga ablihan karong Marso 19, uban sa kooperasyon sa PNP, CSU, Bureau of Fire Protection ug ubang ahensya aron masiguro ang kaluwasan sa mga mananambong.
Lakip sa mga highlights sa kasaulogan ang street dancing, ground competition, float parade, ethnic games ug mga cultural presentations nga ipasundayag mismo sa mga indigenous performers sa Bukidnon.