Hugot nga gihisgutan karun ang rekomendasyon ni Department of Public Works and Highways Secretary Vince Dizon ug sa Independent Commission for Infrastructure (ICI) ang pagpasaka og kasong plunder, paglapas sa Anti-Graft and Corrupt Practices Act, ug direct bribery batok kang kanhi House Speaker ug Leyte Representative Martin Romualdez may kalabot na sa gikaingong maanomaliyang flood control projects sa nasud.
Sumala ni Dizon, gibase ang rekomendasyon sa nakolektang ebidensya ug mga dokumento ug dili hungihong lamang.
Gipahayag niini nga wala siyay kahadlok o pagduha-duha sa pagrekomenda sa kaso subay sa direktiba nga ipasaka ang tanang ebidensya sa Office of the Ombudsman.
Gikatakda usab mutestigo si Dizon sa Sandiganbayan sa laing kaso batok kang Zaldy Co karong Enero 20, 2026, nga may kalabutan gihapon sa flood control projects sa Oriental Mindoro.
Apan matud sa usa ka legal nga eksperto sa balaod nga si Atty. Proculo Sarmen sa pakighinabi sa Bombo Radyo Malaybalay, gisulti niini ang mga angulo ug kwalipikasyon sa posibleng testimonya ni Dizon batok kang Co.
Dako matud pa og tabang ang testimonya sa kalihim gumikan usa kini ka opisyal, apan magpabilin gihapon ang desisyon sa korte.
Sa pagkakaron gisumite na sa Ombudsman ang mga reklamo niadtong Nobyembre 2025 alang sa imbestigasyon ug angay nga desisyon. Kauban usab sa girekomendang kasuhan si kanhi Ako Bicol Partylist Representative Zaldy Co, nga giingong nagpasaka og mga akusasyon batok kang Romualdez ug kang Pangulong Ferdinand Marcos Jr.