Subling gituki sa kagamhanan ning dakbayan sa Malaybalay ang isyu kalabot na sa pagterminate sa joint venture agreement tali sa Malaybalay City Water District ug Prime Water. Gihatagan og pagtagad ni Malaybalay City Mayor Jay Warren Pabillaran ang hisgutan sa posibleng termination pinaagi sa legal nga proseso.
Matud sa mayor, ang maong JVA usa ka legal binding document nga gipirmahan lima na ka tuig ang milabay. Gipasabot niya nga dili kini basta-basta nga dokumento nga mahimong kanselahon nga walay igong legal nga basehan.
Hingpit nga gipasabot sa Mayor nga ang posibleng termination sa Joint Venture Agreement (JVA) tali sa Malaybalay City Water District ug Prime Water kinahanglan nga moagi sa saktong legal nga proseso ug arbitration, sanglit usa kini ka lig-on nga dokumento, bisan pa nga usa sa mga nahimong isyu mao ang wala pagtuman sa Prime Water sa saad nga P500-million nga kantidad sa mga proyekto diin hangtod karun wala pa napatuman.
Subay sa natigayong session kagahapong adlawa sa Malaybalay City Hall gitumbok usab niini nga nagpatuman na ang kagamhanang lokal sa Malaybalay og mga austerity measures sama sa paglimita sa paggamit og aircon ug suga sa mga opisina agig tubag sa krisis sa enerhiya.
Gidugang pa sa mayor nga kung mograbe ang sitwasyon ug madeklarar kini nga usa ka kalamidad, mamahimo nilang magamit ang quick response fund ug maghatag og fuel subsidy aron matabangan ang mga apektadong sektor.
Samtang sa pikas bahin, gipahibalo ni Ivy Amor C. Urbina- CSWD Officer, nga kasamtangang nakig-alayon ang kagamhanang lokal sa DSWD Region 10 alang sa paghatag og cash subsidy nga mokabat sa P5,000 ngadto sa 596 ka mga rehistradong tricycle drivers sa Malaybalay City.
Ang maong ayuda gikatakdang ipang-apod-apod karong Abril 8 isip suporta sa sektor sa transportasyon taliwala sa krisis sa enerhiya.