Nagpabilin sa iyang baroganan si Philippine Coast Guard spokesperson Jay Tarriela nga dili siya mangayo og pasaylo sa China human niya gigamit ang karikatyur ni Chinese President Xi Jinping. Nangutana pa siya kon ngano nga morag gipanalipdan pa ni Senador Alan Peter Cayetano ang China.
Nag-initay silang Senador Alan Peter Cayetano ug Kiko Pangilinan sa wala pa mapasar ang resolusyon nga nagkondena sa Chinese Embassy tungod sa ilang mga pamahayag batok sa atong mga opisyal kalabot sa isyu sa West Philippine Sea. Matod ni Cayetano, bastos si Tarriela sa paggamit sa karikatyur ni Chinese President Xi Jinping. Kinahanglan kuno nga mangayo og pasaylo si Tarriela sa China—usa ka butang nga wala masabti ni Tarriela kon ngano nga nasuko ang senador sa usa lang ka karikatyur.
Dugang pa ni Tarriela, ngano nga dili man ang China ang unang mangayo og pasaylo sa mga mananagat nga Pilipino ug sa Philippine Coast Guard tungod sa ilang pagpanghustisya ug pagpanghasi? Gipahinumdoman usab ni Tarriela si Cayetano mahitungod sa “decorum” nga gipangita niini, dungan sa paghisgot sa panahon nga ang senador pa ang Foreign Affairs Secretary sa administrasyong Duterte. Morag gipanalipdan pa kuno ni Cayetano ang presidente sa China.
Sa wala pa ang lalisay nilang Cayetano ug Tarriela, giimbitahan na ni Tarriela si Senador Rodante Marcoleta nga magpatrolya sa West Philippine Sea. Kini human sa giingon ni Marcoleta nga angay na kunong i-surender ang Kalayaan Island Group.
Gitawag og “Chinador” sa political analyst nga si Ronald Llamas ang mga senador nga morag dapig sa China. Gawas sa mag-amahang Marcoleta, abli usab si Tarriela nga imbitahon si Cayetano sa Pag-asa Island. Una na hinuong niingon si Marcoleta nga kulang sa konteksto ang iyang viral nga pamahayag.
Sa katapusan, gihimakak ni Tarriela nga gigamit niya ang isyu sa West Philippine Sea para makasulod sa politika. Una na nga nipasaka og diplomatic protest ang Beijing batok kang Tarriela. Gikondena usab sa China ang resolusyon nga nakalusot sa Senado; matod nila, usa kini ka “political stunt” nga nagtuis sa kamatuoran ug nagguba sa diplomasya. Magpabiling lig-on kuno ang China ug ipadayon ang relasyon sa Pilipinas bisan pa og pila ka anti-China nga resolusyon ang mapasar.
Sa tunga-tunga sa debate sa mga opisyal, usa ra ang tubag sa Malacañang..