Human ang pipila ka adlaw nga retrieval operations, gideklara na sa Bureau of Fire Protection (BFP) Region 7 nga nakit-an na ang tanang gikatahong nawala human sa nahitabong pagdahili sa basura sa Barangay Binaliw, Cebu City.
Ang katapusang lawas nakuha kaganeha sa alas 5:41 sa buntag. Miabot sa 36 ang kumpirmadong patay, diin silang tanan mga lalaki ug empleyado sa Prime Waste Solutions ug sa mga subcontractor niini.
Gibutyag ni Cebu City Councilor Dave Tumulak nga dako og tabang ang mga K-9 unit gikan sa Iloilo sa pagtultol sa nahimutangan sa mga biktima.Nahitabo ang landslide niadtong Enero 8, sa alas 4:17 sa hapon.
Nagpahigayon usab ang siyudad og “Day of Mourning” niadtong Enero 16 aron paghatag og pasidungog sa mga namatay.Ubos na sa State of Calamity ang dapit, diin naggahin ang kagamhanan og P30 milyones gikan sa emergency funds alang sa pagtubag sa krisis sa basura ug uban pang panginahanglan.
Nahuman na ang search and retrieval operations apan padayon gihapon ang pagmonitor sa maong site alang sa seguridad.