Usa ka talagsaon ug karaan nga tradisyon sa nasod sa Nigeria ang nahimong viral karon sa social media, diin ang usa ka pangasaw-onon o bride gidid-an sa pagpahiyom o pagkatawa sa tibuok dagan sa seremonya sa kasal.
Ubos sa tradisyon sa tribong Ijaw sa Nigeria, ang bride kinahanglan nga magpabiling seryoso ang hitsura sa tibuok adlaw. Mahimo lamang siyang mokatawa o mopahiyom kon ihatag na kaniya ang kantidad sa kwarta nga iyang gipangayo o kon matagbaw na siya sa kwarta nga i-halad kaniya sa pamilya sa pamanhonon (groom).
Kini nga ritwal gitawag og “Buying the Bride’s Smile” o ang pagpalit sa pahiyom sa pangasaw-onon. Tumong niini nga ipakita ang kabililhon sa babaye ug ang kaandam sa lalaki nga mohatag og suporta ug seguridad sa iyang umaabot nga asawa.
Sa maong tradisyon, magpundok ang pamilya sa lalaki aron mohatag og kwarta samtang ang bride naglingkod ug nagmagul-on ang nawong. Kon sa tan-aw sa bride gamay pa ang kwarta, magpabilin siyang seryoso hangtod nga madugangan kini sa pamilya sa lalaki. Kon duna nay saktong kantidad, diha pa lamang makita ang tam-is nga pahiyom sa pangasaw-onon nga simbolo usab sa iyang pagdawat sa pamanhonon ug sa pamilya niini.