Suspek sa pagpanulis sa dalan, sikop sa Talakag, Bukidnon

Nakatingkagol na sa selda sa kapulisan ang usa ka 51-anyos nga lalaki human silbihi sa iyang warrant of arrest tungod sa kasong paglapas sa balaod batok sa pagpanulis sa dalan.

Giila sa Bukidnon Police Provincial Office (BUKPPO) ang dinakpan nga si Darry Balsamo Cariaga, usa ka mag-uuma ug residente sa Purok 5B, Barangay North, Maramag, Bukidnon.

Ang operasyon gipahigayon sa mga otoridad niadtong milabayng adlaw, mga alas 2:55 sa hapon. Ang korte nagrekomendar og piyansa nga mobalor sa ₱100,000 alang sa iyang temporaryong kagawasan samtang nagpadayon ang dagan sa kaso.

Sa pagkakaron, ang suspek anaa na sa kustodiya sa Talakag Municipal Police Station (MPS) alang sa saktong dokumentasyon ug tukmang disposisyon sa iyang kaso.