Paslak sa bilanggoan ang 50-anyos nga mag-uuma human niya gitigbas sa ulo ang iyang 51-anyos nga bayaw sa Kibawe, Bukidnon.
Nahitabò ang pagpanigbas pasado alas 12:10 sa kadlawon niadtong Marso 14 sa Purok 3, Brgy. Sampaguita, Kibawe, Bukidnon. Sa pakighinabi sa Bombo Radyo Malaybalay kay PCpt. Leonila R. Vicente, Chief of Police sa Kibawe MPS, gitawag sa suspek ang biktima nga si alyas Larry Sahulga Soronio sa gawas sa balay. Sa dihang nigawas ang biktima, kalit siyang gitigbas sa wala nga bahin sa ulo gamit ang sundang.
Nasayran nga ubos sa impluwensya sa ilimnon nga akahubog ang suspek samtang wala makainom ang biktima. Giingong kanunay kining manghasi kung makahubog.
Daling gidala sa balay tambalanan ang biktima ug anaa na sa luwas nga kahimtang. Nadakpan ang suspek sa hot pursuit operation uban ang tabang sa mga barangay opisyal ug karon anaa na sa kustodiya sa pulisya.
Andam nang ipasaka ang kasong frustrated homicide batok sa suspek sa piskalya sa Bukidnon.