Gipadayag sa legal nga eksperto nga nag-assist sa operasyon sa pagkasikop sa suspek sa brutal nga pagpatay sa usa ka 15-anyos nga Grade 9 student sa Sitio Sinait, Barangay Dagat-Kidavao, Valencia City, nagpakita og kahadlok ug trauma sa unang higayon nga pag-atubang sa mga otoridad.
Sa pagpanubay sa Bombo Radyo Malaybalay, gibutyag ni Atty. Jarold Rey Generalao, nga sa dihang unang nakita ang suspek nga si Marlon Abdon, 38-anyos, trabahante sa katubhan ug residente sa maong lugar, klaro matud pa ang kahimtangan niini nga nahadlok ug nabatyagan ang trauma.
Matud usab ni Valencia City Vice-Mayor Greizl Galario-Fernandez, nga pinaagi sa hapsay nga koordinasyon tali sa lokal nga kagamhanan, mga otoridad, ug sa legal nga grupo nga nag-assist, napugos ang suspek nga mokanaog ug motugyan sa kaugalingon.
Sumala ni Atty. Heinz Guderian Villanueva, Valencia City Administrator, human sa pagkasikop, gikumpirma sa suspek ngadto sa mga imbestigador nga gilugos niini ang menor-de-edad nga biktima sa wala pa kini brutal nga gipatay ug gipugotan og ulo nga nakaplagan sa katubhan sa nahisgutang lugar kaniadtong Enero 8, 2025.
Gipadayag ni Jun M. Galario, Jr., kanhi Mayor sa Valencia City ug karon Consultant ug Spokesperson sa lokal nga kagamhanan sa syudad, nga ang suspek adunay na kaniadto kasong pagpatay ug giila nga usa ka ex-convict.
Matud pa niini, nalambigit si Abdon sa usa ka laing makalilisang nga insidente sa Lantapan, lalawigan sa Bukidnon, diin gisunog ug gipatay matud pa niini ang batang anak sa kanhi ka-live-in partner.
Samtang gipahigayon ang operasyon sa pagsikop sa suspek, gibutyag usab nga misulay ang ginikanan niini sa pagpanalipod pinaagi sa pagpanghimakak sa kriminal nga rekord sa suspek kaniadto.
Giklaro sa usa ka eksperto sa panghunahuna nga dili tukma ang paggamit sa terminong “trauma” alang sa suspek sa brutal nga pagpatay sa menor-de-edad sa Purok 1, Sitio Sinait, Barangay Dagatkidavao, Valencia City.
Sa eksklusibong pakighinabi sa Bombo Radyo Malaybalay kang Stella Ferrarez, usa ka registered psychometrician, gipadayag niini nga ang trauma kasagarang naggikan sa grabeng hulga sa kinabuhi ug nagbilin og dugayng epekto sa hunahuna, nga mas makita sa mga biktima kung buhi pa kaysa sa nakahimo sa krimen.
Matud pa sa eksperto, posibleng gigamit lamang ang alegasyon sa trauma isip legal nga depensa sa suspek aron mapahuyang ang kaso.
Gipasabot usab ni Ferrarez nga ang tinuod nga pagkatrauma kasagaran mogawas pipila ka bulan human sa panghitabo ug nagpakita sa mga simtoma sama sa kanunay nga kahadlok, pagkabalaka, kalisod sa pagkatulog, ug emosyonal nga kalisdanan