Gibuhian sa prisohan ang suspek sa brutal nga pagpatay sa 15-anyos nga dalagita sa Valencia City human madismiss sa korte ang kasong direct assault nga unang gisaka batok kaniya.
Sa pakighinabi sa Bombo Radyo Malaybalay kay PCpt. Sheila Joy P. Jangad, tigpamaba sa Bukidnon Police Provincial Office, ang kasong direct assault may kalabotan sa giingong pag-atake sa usa ka barangay tanod sa dihang giadtuan sa mga otoridad ang suspek isip person of interest human madiskobre ang patayng lawas sa biktima sa Barangay Dagat‑Kidavao.
Tungod niini, gipatuman sa kapulisan ang hot pursuit operation nga mitultol sa pagsurender sa suspek. Apan, nadismiss sa korte ang maong kaso nga hinungdan nga nakagawas kini sa kustodiya.
Gipasabot sa kapulisan nga ang kasong rape with homicide batok sa suspek may kalabotan sa giingong paglugos ug pagpatay sa menor de edad, padayon pang ginaproseso, ug naghulat na lamang ang mga otoridad sa warrant of arrest aron masikop pag-usab ang suspek.
Samtang gawas sa prisohan, gibutyag ni Jangad nga ginamonitor sa intelligence operatives sa kapulisan ang lihok sa suspek aron masiguro nga dili kini makalikay sa hustisya.
Nagpasalig usab ang kapulisan nga magpadayon ang 24/7 nga pagbantay ug koordinasyon sa lokal nga panggamhanan ug mga force multipliers aron mapadayon ang kalinaw ug kahapsay sa tibuok probinsya sa Bukidnon ug malikayan ang susamang krimen.