Mitahan na sa mga otoridad ang suspetsado sa nahitabong brutal nga pagpangdunggab sa Zone 1, Barangay Kalasungay, ning syudad, nga mikalas og usa ka kinabuhi ug miangol sa duha ka uban pa.
Kahinumduman nga niadtong Disyembre 29, nakadawat og report ang kapulisan mahitungod sa kagubot nga nagsugod sa panagbangi samtang nag-inom ang tulo ka managsilingan. Sumala ni PMSG. Ken Hanzel Bughaw, tigpamaba sa Malaybalay City Police Station, miabot ang suspetsado nga hubog ug giatubang sa manghod sa biktima mahitungod sa usa ka karaan nga atraso nga misangpot sa panaglalis.
Mipauli ang suspetsado apan mibalik kini bandang alas-8 sa gabii nga nagdala og kutsilyo ug gipangdunggab ang mga biktima. Nakabsan sa kinabuhi si Oliver Sigod human maigo sa tuong bahin sa iyang dughan, samtang ang duha ka magsoon nga nasamdan sa likod, liog, ug kamot, anaa na karon sa luwas nga kahimtangan human madala sa balay-tambalanan.
Human sa pipila ka adlaw nga pagtago-tago samtang gipahigayon ang hot pursuit operation sa kapulisan, nadesisyonan sa suspetsado nga mosurender aron atubangon ang mga kasong ipasaka batok kaniya.