Gipangandaman na sa Department of Education (DepEd) Division of Bukidnon ang pag-host sa Northern Mindanao Regional Athletic Association kon (NIMRAA) Meet sa tuig 2026 pinaagi sa pakig-alayon sa nagkadaiyang sangay sa gobyerno.
Sa exclusibong pakighinabi sa Bombo Radyo kay Said Macabago, Public Schools District Supervisor ug Division Information Officer sa DepEd Bukidnon, ang tulo ka mga division sa probinsya ang Bukidnon, Malaybalay City ug Valencia City hugot nga nakig-coordinate sa provincial government alang sa maong dakong kalihokan.
Gibutyag ni Macabago nga matag adlawng Huwebes nagpahigayon og regular nga tigum ang ilang technical working group aron plantsahon ang tanang preparasyon.Usa sa mga nag-unang prayoridad sa DepEd mao ang siguridad sa suplay sa tubig sa mga billeting quarters.
Tungod sa hagit sa water system sa dakbayan sa Malaybalay, nakig-alayon ang buhatan sa Bureau of Fire Protection (BFP).Nag-request na ang DepEd og water logistics support ug mga water tank gikan sa BFP aron masiguro ang saktong rasyon sa tubig alang sa sanitation ug uban pang panginahanglanon sa mga delegado.
Sa laing bahin gipasalig ni Mayor Jay Warren R. Pabillaran ang hugot nga pagpangandam sa dakbayan alang sa NMRAA 2026 pinaagi sa pag-atiman sa mga panginahanglanon sa mga atleta.
Nakatutuk karon ang syudad sa saktong suplay sa tubig tungod sa nasinating mga problema sa serbisyo niini. Tumong sa mayor nga mahimong hapsay ang dagan sa programa ug masiguro nga luwas ang mga puy-anan sa mga delegado gikan sa nagkalain-laing dapit sa rehiyon.