Gipasiguro sa Department of Agriculture–Region 10 nga igo ang suplay sa bugas sa rehiyon bisan pa og 86% lamang ang rice sufficiency level, tungod sa padayong produksyon sa humay ug pagsugod sa panahon sa ani.
Sa pakighinabi sa Bombo Radyo Malaybalay kay Mary Grace Sta. Elena, tigpamaba sa Department of Agriculture–Region 10, na matod pa dili tanan probinsya sa rehiyon adunay dagkong produksyon sa humay, sama sa Camiguin nga gamay lamang ang tanomang humayan. Bisan pa niini, nagpadayon nga mosobra ang produksyon sa Bukidnon, nga gihulagway sa ahensya isip food basket sa bugas sa tibuok rehiyon.
Gipatin-aw ni Sta. Elena nga nagsugod na usab ang panahon sa harvest sa pipila ka lugar, hinungdan nga nagpadayon ang suplay sa bugas sa merkado sa Northern Mindanao.
Samtang, giawhag sa Department of Agriculture ang publiko nga dili lamang magsalig sa bugas isip pangunang pagkaon kondili mag-apil usab og mga lagutmon sama sa kamote, kamoteng kahoy, mais, saging ug uban pang alternatibong pagkaon aron mapalambo ang food security sa rehiyon.