Padayon karon ang gihimong imbestigasyon sa Bukidnon Police Provincial Office (BPPO) kalambigit sa sunod-sunod nga mga pagpamusil sa lalawigan aron mailhan ang mga responsable ug mahatagan og hustisya ang mga biktima.
Sa pakighinabi sa Bombo Radyo Malaybalay kang Police Captain Sheila Joy P. Jangad, ang tigpamaba sa BPPO, iyang gikumpirma nga usa na ka suspisado ang nadakpan may kalabutan sa pagpamusil sa lungsod sa Kibawe. Nasikop ang maong suspisado sa adlaw mismo sa pagpangatake diin narekober gikan kaniya ang usa ka Uzi caliber 9mm nga adunay magazine ug upat ka mga bala.
Samtang sa laing bahin, nagpadayon ang hot pursuit operation sa lungsod sa Pangantucan pinaagi sa gi-activate nga “Oplan Shield.” Nakig-alayon na ang Pangantucan Municipal Police Station sa mga silingang estasyon sa kapulisan aron mapigngan ang pag-ikyas sa suspisado ug mapadali ang pagdakop niini.
Gipasalig usab sa BPPO ang pagpakatap sa mga personahe alang sa strategic police deployment ug police visibility sa mga apektadong dapit aron mapalig-on ang seguridad sa publiko ug masiguro ang paspas nga dagan sa hustisya alang sa mga biktima.