Giduso sa Prime Minister sa Senegal ang usa ka sugyot balaodnon nga magdoble sa silot batok sa same-sex relations, diin mahimo kining moresulta sa hangtod 10 ka tuig nga pagkabilanggo.
Sumala ni Ousmane Sonko, si bisan kinsa nga mapamatud-an nga naghimo og “act against nature” pagasilotan og lima (5) hangtod 10 ka tuig nga pagkabilanggo, gikan sa kasamtangang silot nga usa (1) hangtod lima (5) ka tuig.
Napasa na sa National Assembly sa Senegal ang maong sugyot human kini aprobahi sa gabinete sa miaging semana.
Gisulong kini nunot sa sunod-sunod nga pag-aresto sa mga tawo nga giakusahan nga nakalapas sa kasamtangang balaod batok sa LGBTQ. Sumala sa kapulisan, lakip sa mga nadakpan karong bulana ang pipila ka mga lalaki, lakip na ang duha ka lokal nga personalidad ug usa ka iladong tigbalita.
Sa pikas bahin, nareport usab ang mga kaso sa same-sex relations nga nalambigit sa laing kaso sa pag-abuso sa mga menor de edad. Sa maong kaso, giila sa mga imbestigador ang usa ka grupo nga giakusahan og sexual violence batok sa mga bata, diin 14 ka tawo ang nadakpan.
Gipahayag ni Sonko nga sakop sa maong sugyot balaodnon ang duha ka isyu ang same-sex relations ug ang child sexual abuse. Dugang pa niini, kon ang maong buhat naglambigit og menor de edad, ipahamtang ang labing bug-at nga silot.
Makita usab sa maong balaodnon nga ang bisan unsang sexual act tali sa duha ka tawo nga pareho og identidad nagpasabot nga usa ka “act against nature.” Aduna usab kini probisyon nga magsilot og tulo (3) hangtod pito (7) ka tuig nga pagkabilanggo sa bisan kinsa nga magpasiugda o maghimo og advocacy alang sa same-sex relations.
Dugay na nga sensitibong hisgutanan sa Senegal ang LGBTQ rights, diin sagad mosupak ang mga relihiyosong pundok sa maong mga adbokasiya ug moingon nga kini impluwensya lamang gikan sa mga nasud sa Western countries. Pipila na usab ka mga demonstrasyon ang gipahigayon sa nangaging katuigan aron mangayo og mas bug-at nga silot.