Balik na sa hingpit nga pag-ensayo ang superstar sa Golden State Warriors nga si Stephen Curry human ang hapit duha ka bulan nga wala makaduwa tungod sa iyang injury.
Sumala sa report, miapil na si Curry sa tibuok practice sa team niadtong Martes (Marso 31, 2026), lakip na ang ilang 5-on-5 scrimmage. Mao kini ang unang higayon nga nakabalik siya sa full contact practice sukad siya nakaangkon og injury sa iyang wala nga tuhod (left knee) niadtong Pebrero.
Gipahayag ni Warriors head coach Steve Kerr nga nindot ang gipakita ni Curry sa ensayo ug wala na kini makasinati og sakit sa iyang tuhod. Bisan pa niini, duna gihapoy limitasyon ang iyang lihok sa pagkakaron aron maseguro nga dili na mobalik ang maong injury.
Gipaabot nga mobalik na sa aksyon si Curry sa dula sa Warriors batok sa New Orleans Pelicans karong Biyernes (Abril 3, 2026). Ang pagbalik sa “Chief Cook” dako og tabang sa Warriors nga kasamtangang nakigbisog alang sa ilang pwesto sa NBA playoffs.