Nagpadayon ang epekto sa habagat diin walay hunong nga pag-ulan nga misangpot sa pagbaha, landslide, ug pagkadaot sa daghang kabalayan, kabtangan, ug infrastruktura sa daghang bahin sa Pilipinas.
Tungod niini, daghang lokal nga kagamhanan ang nagdeklara og state of calamity aron dali silang makalihok ug magamit dayon ang ilang calamity fund alang sa relief operations ug emergency response.Lakip sa mga lugar nga nagdeklara og state of calamity mao ang Cavite, Cebu City, Sebastian, Antique, Malabon City, Quezon City, Manila, Calumpit, Bulacan, Malasiqui ug Umingan sa lalawigan sa Pangasinan.
Pinaagi sa maong deklarasyon, mas paspas ang pagpagawas og pondo alang sa pagkaon, tubig, ug uban pang mga panginahanglan sa mga biktima. Magpatuman usab og “price freeze” sa mga apektadong lugar. Ang mga suplay sama sa bugas, tubig, medisina, sardinas, ug uban pang batakang produkto dili pwede pasakaan og presyo sulod sa panahon sa kalamidad.
Ang Department of Trade and Industry (DTI) maoy magabantay niini ug magmando sa mga negosyante nga motuman. Nagpadayon ang paningkamot sa mga otoridad aron masalbar ang mga apektadong residente, ilabi na kadtong nagpuyo sa mga lugar nga delikado sa landslide ug baha. Padayon sab ang pagpanghatag og relief goods ug temporaryong puy-anan sa mga evacuation center.