Giplano sa lokal nga kagamhanan ang pagbutang og Starlink internet connection sa 46 ka barangay sa Dakbayan sa Malaybalay aron mapalig-on ang komunikasyon ug paspas nga pagresponde panahon sa emerhensya ug kalamidad.
Sa ekslusibong pakighinabi sa Bombo Radyo Malayabalay ngadto kang Committee Chair on Communications nga si Atty. Rendon Sangalang, City Councilor niining syudad, gipahibalo sa City Government of Malaybalay nga ang proyekto mao’y kabahin sa Digital Malaybalay City Initiative nga nagtinguha sa mas lapad nga konektibidad ug teknolohikal nga kalambuan sa dakbayan.
Dugang pa ni Sangalang, gilauman nga masugdan ang implementasyon sa Starlink connection sa sunod tuig samtang ginasiguro pa ang pondo alang sa pagpadagan sa proyekto
Ang maong internet installation naglangkob sa mga lugar nga lagyo ug lisod maabot sa signal aron mapadali ang paghatag og tabang kon adunay emerhensya. Matod pa ni Sangalang, makatabang kini nga proyekto aron mas dali mahatagan og impormasyon ug koordinasyon ang mga otoridad sa panahon sa kalamidad o insidente.
Ang maong inisyatiba nagpakita sa padayon nga paningkamot sa lokal nga pangagamhanan ug mga institusyon sama sa Bukidnon State University aron mapauswag ang Digital Malaybalay City ug mapahimutang kini isip ICT ug innovation hub sa syudad.