Kumpiyansang gipahayag ni Senate President Vicente “Tito” Sotto III nga walay mahitabong kudeta o pag-ilis sa liderato sa Senado sa dili pa mag-adjourn ang sesyon karong Oktubre 10, Biyernes ning tuiga. Sumala ni Sotto, magpabilin ang suporta sa mga miyembro sa majority bloc, ug wala na’y kinahanglan nga loyalty check sa grupo sa mga senador.
Giklaro usab niini nga nagkaistorya sila ni Senate Minority Leader Alan Peter Cayetano kabahin sa isyung siya ang mopuli kaniya, apan gihimakak ni Cayetano nga walay kamatuoran ang maong pasangil. Gipahimangnoan usab ni Sotto ang mga senador nga dili magpadala sa intriga ug magpokus sa trabaho, ilabi na sa paghisgot sa gisugyot nga national budget.
Sa laing bahin, gibutyag ni Sotto nga “na-frustrate” si Senate President Pro Tempore Panfilo “Ping” Lacson tungod sa mga komento sa ubang senador kabahin sa iyang pagdumala sa imbestigasyon sa giingong anomalya sa flood control projects. Matod ni Sotto, si Lacson nakulbaan sa padayong reklamo — kay kung magpahigayon kini og hearing, adunay magareklamo, ug kung dili siya magpahigayon, adunay gihapon mangutana nganong wala. Tungod niini, mikanaog si Lacson sa iyang posisyon isip chairman sa Senate Blue Ribbon Committee.