Gisuportahan sa mga senador ang Senate Bill No. 1512 nga nagtumong sa paghimo og Independent People’s Commission (IPC) aron mosusi sa korapsyon sa mga proyekto sa imprastraktura. Kini nga sugyot balaodnon maoy kapuli sa Senate Bill 1215 nga gisumite ni Senate President Vicente “Tito” Sotto III.
Matod ni Senator Francis “Kiko” Pangilinan, chairman sa Committee on Justice and Human Rights, ang Independent People’s Commission (IPC) kung mapasa sa balaod, adunay gahum nga mopasaka sa subpoena, mag-freeze og assets, magpataw og contempt, mag-cancel og professional license, maghatag og witness protection, ug mag-isyu og lookout orders. Aduna usab kini’y fiscal independence.
Gipasabot ni Pangilinan nga ang IPC magpahigayon og public hearings ug mosiguro nga patas ang imbestigasyon. Samtang si Sotto nagpasabot nga kinahanglan adunay manubag sa mga kawad-an sa pondo, ilabi na sa mga flood-control projects nga gihatagan og billion-peso budget apan wala nakahatag og seguridad sa katawhan. Gisuspinde ang paghisgot sa maong bill aron hatagan og panahon ang mga senador sa pagtuon niini.