Nangayo og pasaylo si Mark Adrian Napiza, ang SK Chairperson sa Barangay Bubukal sa Sta. Cruz, Laguna, human nag-viral ang iyang video diin makit-an siyang naghikap-hikap sa mga siopao ug hotdog sulod sa usa ka convenience store nga walay suot nga gloves.
Giangkon ni Napiza nga dili angay ug dili ehemplo ang iyang gibuhat isip usa ka lider sa kabatan-onan. Matod niya, iyang giangkon ang tanang responsibilidad ug andam siyang moatubang sa bisan unsang silot o aksyon nga ipahamtang kaniya.
Giklaro usab sa opisyal nga iyang gibayran ang tanang pagkaon nga iyang nahikap ug personal na siyang nakig-istorya sa tagdumala sa tindahan aron mangayo og dispensa. Sa pagkakaron, ang maong isyu giimbestigahan na sa SK Federation ug sa Department of the Interior and Local Government (DILG) sa ilang lungsod.