Gipaspasan na karon sa kagamhanan sa probinsya sa Bukidnon, kaabag ang mga dibisyon sa DepEd Malaybalay ug Valencia City, ang pagpadali sa tanang rekisitos alang sa pag-host sa Northern Mindanao Regional Athletic Association (NMRAA) 2026 nga gikatakdang ipahigayon karong Marso 18 hangtod 24 dinhi sa Bukidnon Sports Complex.
Sa gihimong pakighinabi sa Bombo Radyo Malaybalay kay Ariel Montecalbo, ang DepEd Sports Coordinator, gibutyag niini nga anaa na sa 75% ang kaandamon sa mgapuy-anan samtang anaa na sa 95% ang kaandamon sa mga playing venues. Tumong sa maong preparasyon nga mahatagan og hapsay ug dekalidad nga dapit ang mga delegasyon gikan sa tibuok rehiyon sa Northern Mindanao.
Aron matubag ang mga nag-unang hagit, gipangayoan na og tabang ang 20 ka munisipyo nga mag-augment og mga Patient Transport Vehicles (PTV) alang sa transportasyon, dungan sa pagpahimutang og mga water tank ug fire trucks aron masolusyonan ang problema sa tubig sa dakbayan sa Malaybalay.
Gawas sa main complex, adunay mga dula nga ipahigayon sa Valencia, Sumilao, Quezon, ug Kibawe aron masiguro ang kompleto nga pasilidad alang sa nagkalain-laing sports. Sa pagkakaron, gitapos na ang konstruksyon sa mga extension sa dirty kitchens ug mga banyo sa mga tulunghaan nga sak-an sa mga delegado.
Sa bahin sa seguridad, gipasalig ni Montecalbo nga andam na ang Incident Command System (ICS) ubos sa pagtinabangay sa PNP, Provincial Health Office (PHO), ug DRRM. Nakapahigayon na og serye sa mga tigum ang maong grupo aron masiguro nga adunay konkretong plano sa bisan unsang emerhensya nga mahitabo sa dagan sa kompetisyon.
Pinaagi niining lig-on nga koordinasyon, gilauman ang usa ka malampuson ug luwas nga NMRAA 2026 alang sa tanang kabatan-onang atleta.