Padayon ang ginahimog manhunt operation sa kapulisan batok sa mga suspetsado sa pagpamusil-patay sa usa ka senior citizen sa Purok 5, Barangay Danggawan, Maramag, Bukidnon.
Sa eksklusibong pakighinabi sa Bombo Radyo Malaybalay kang PLtCol. Alexander E. Eugenio, Chief of Police sa Maramag Municipal Police Station, gibutyag niini nga ang mga suspek sa pagpamusil-patay sa biktima nga si Ronald Valenzuela, 60 anyos, nagpakaaron-ingnon matud pa nga delivery rider sa parcel.
Sumala sa imbestigasyon sa kapulisan, wala’y namatikdan nga kontra o kaaway ang biktima base sa pamahayag sa mga kabanay.
Dugang pa, bag-o lamang kini nakagawas sa ospital ug kadaghanan sa panahon anaa ra sulod sa panimalay.
Giklaro sa kapulisan nga sa higayon sa insidente, naghimo og hollow block ang biktima uban sa kauban dihang kalit nga miabot ang duha ka lalaki nga sakay sa motorsiklo.
Ang mga suspek nagpailang delivery rider ug nangutana kung mao ba kini si Ronald Valenzuela.
Human makumpirma ang identidad, kalit nga gipusil ang biktima. Tungod sa komosyon, makaduha ka higayon kining gipusil sa ulo sa mga suspek nga dayon miikyas padulong sa wala matinong direksyon.
Matud pa sa ni PLtCol.Eugenio, .45 caliber nga pusil ang gigamit sa krimen ug padayon ang lawom nga imbestigasyon ug hot pursuit operation sa Maramag Municipal Police Station aron mailhan ug madakpan sa labing dali nga panahon ang mga responsable sa maong insidente.