Gihangyo ni Senate President Francis Escudero ang House of Representatives nga respetuhon ang desisyon sa Impeachment Court nga ibalik ang reklamong impeachment batok ni Bise Presidente Sara Duterte. Matod ni Escudero, hangtod karon, wala pa siya’y nadawat nga opisyal nga House resolution nga nagkumpirma nga ang Articles of Impeachment nasunod sa mga probisyon sa 1987 Konstitusyon.
Giingon niini nga ang korte wala magbasura sa kaso ug wala kini nagpasabot og deadlock sa proseso. Giila usab sa Senate President nga obligasyon sa House of Representatives nga motuman sa mga procedural nga desisyon sa Impeachment Court, ug giingon niyang si VP Duterte kinahanglan nga motubag sa gipagawas nga summons sa kaso.
Samtang, si kanhi Supreme Court Justice Adolfo Azcuna mipasabot nga legal ug makatugot ang desisyon sa Senado nga i-remand o ibalik ang kaso sa House aron matino nga lig-on ang mga basehan niini ug andam na kini alang sa sunod nga Kongreso.
Bisan pa man og bag-o nga pamaagi ang pag-remand sa kaso, giingon ni Azcuna nga kini usa ka paagi aron masiguro nga makalusot kini sa tanang legal nga proseso ug malikayan ang posibleng teknikalidad nga mahimong makapaluya sa reklamo Nagpabilin nga aktibo ang Impeachment Court ug adunay hurisdiksyon sa maong kaso, subay sa mandato sa konstitusyon.
Apan ang mga kritiko mipasidaan nga daw mas nakapabor ang Senado sa depensa kay sa prosecution nga ilang giingon nga mahimong makapahinay sa tibuok proseso sa impeachment.