Giduso karon sa Senado ang lakang nga malakip ang mga sakop sa “middle class” sa katilingban sa makadawat og ayuda gikan sa gobyerno.
Taliwala kini sa walay hunong nga pagsaka sa presyo sa lana nga nakaapekto sa budget sa mga ordinaryong trabahante.
Matud pa ni Senator Erwin Tulfo, ang maong sektor kanunay nga “nakalimtan” sa mga social amelioration program sa kagamhanan, bisan pa man og kini direkta nga naapektuhan sa inflation ug sa nagmahal nga presyo sa mga palaliton.
Sa gihisgutan nga hearing sa Committee on Social Justice, Welfare and Rural Development, gihatagan og gibug-aton nga ang mga empleyado nga nagdawat og minimum wage nga apektado taliwala sa pagsaka sa pletehan ug presyo sa pagkaon.
Samtang gikumpirma ni Department of Labor and Employment (DOLE) Undersecretary Adeline De Castro nga padayon nga gi-monitor ang pundo sa ahensiya ug adunay gigahin nga ₱1.2 bilyon nga budget aron itabang sa mga trabahante nga apektado sa krisis.