Gibarugan sa Senador nga si Juan Miguel “Migz” Zubiri ang iyang pagsupak sa House Bill 621 aron mapanalipdan ang katungod sa mga lumad sa Bukidnon.
Gipadayag kini sa senador atol sa panagtapok sa mga Indigenous Peoples Mandatory Representatives (IPMR) gikan sa nagkadaiyang lungsod ug siyudad sa probinsya, nga gipahigayon sa Bukidnon Center for Culture and the Arts niadtong Sabado, Marso 21, 2026. Sumala kaniya, dili siya uyon sa maong balaodnon tungod kay posible kining makahatag og dugang kalisod sa mga lumad, ilabi na sa pagdumala sa ilang yutang kabilin.
Gipasabot ni Zubiri nga ang House Bill 621 maghatag og katungod sa Department of Environment and Natural Resources sa pagtitulo sa mga ancestral domain nga kasamtangang ubos sa National Commission on Indigenous Peoples. Busa, andam siyang motrabaho aron mapadayon ang proteksyon sa rights ug privileges sa mga katigulangan, ug suportahan ang mga lakang nga magpabilin sa NCIP ang gahum sa maong mga yuta.
Sa katapusan, gipasalig sa senador nga padayon niyang paningkamotan ang pagpanalipod sa interes sa mga lumad, ug gipahimangno nga dili angay kabalak-an ang maong panukalang balaod tungod kay dili kini madayon samtang siya mosupak niini.