Nagtuo si Senator Sherwin Gatchalian nga kinahanglang ipadayon ang gihimong imbestigasyon sa Independent Commission for Infrastructure (ICI) sa giingong mga anomaliya sa flood control projects taliwala sa pagbiya sa mga opisyal sa komisyon.
Sumala ni Senator Win, dili ikalimod nga dili na kaya sa usa ka opisyal nga ipadayon ang imbestigasyon sa mga giingong anomaliya sa kagamhanan busa kinahanglan ang pagtudlo og mga bag-ong opisyal human sa pagkanaog ni kanhi Commissioner Rosanna Fajardo niadtong Disyembre ug kanhi Chair Commissioner Rogelio Singson.
Bisan pa niini, nagtuo si Gatchalian nga duna pay makit-an nga mga maayong personalidad nga mahimong muhulip sa bakanteng posisyon sa ICI. Importante matud pa nga magpadayon ang imbestigasyon tungod kay dinhi nagsalig ang publiko aron mahibaloan ang kamatuoran sa mga giingong kahiwian sa gobyerno.
Dugang pa sa senador, uyon kini sa pagmugna sa gidusong Independent People’s Commission (IPC) sa Senado alang sa mas gipalig-on ug mas gipakusog nga imbestigasyon sa mga kahiwian sa gobyerno.
Dugang pa niini, kinahanglan adunay manubag ug mapriso ilabi na kadtong mga nalambigit sa flood control project scandal bisan pa kon kini opisyal sa gobyerno.Gipangunahan ni Gatchalian nga ang buhis sa matag Pilipino ang gikawat busa angay lang nga manubag ang mga nalambigit sa korapsyon.
Masaligon si Senator Win nga dili makaya sa ICI ang pagpahigayon sa imbestigasyon kon walay matudlo nga mga bag-ong opisyal sa komisyon. Apan samtang wala pa namugna ang gidusong Independent People’s Commission, kinahanglang magpadayon ang imbestigasyon sa ICI busa mahinungdanon ang pagtudlo og mga bag-ong opisyal.