Nagpahayag og dakong kabalaka si Senador Erwin Tulfo, chairperson sa Senate Foreign Relations Committee, sa nagkagrabeng tensiyon sa Middle East human sa pag-atake sa Iran sa United States ug Israel, ug sa misunod nga pagbalos sa Iran pinaagi sa pagpalupad og missiles ug drones batok sa Israel ug mga base sa US sa rehiyon.
Sumala ni Tulfo, nga ang nagkagrabe nga panagbangi nagbutang sa peligro sa kaluwasan sa mga sibilyan, lakip na ang liboan ka mga Pilipino nga nagtrabaho ug nagpuyo sa Middle East.
Dugang pa ni Tulfo, nag-andam na ang Department of Foreign Affairs (DFA) aron masiguro nga adunay exit points alang sa posibleng pag-evacuate sa mga Pilipino gikan sa Iran ug Israel.
Nakaalerto usab ang mga opisyal sa embahada aron motabang sa mga Pilipino sa mga apektadong nasud.
Samtang, nanawagan usab si Senador Sherwin Gatchalian, chairperson sa Senate Finance Committee, sa Department of Migrant Workers (DMW) nga mag-andam sa posibleng repatriation sa mga overseas Filipino workers (OFWs).
Gihisgutan ni Gatchalian ang P2-bilyon nga pondo sa Agarang Kalinga ug Saklolo para sa mga OFW nga Nanginahanglan (AKSYON) Fund sa DMW, nga gamiton alang sa dali nga tabang ug pagpauli sa mga OFW nga anaa sa peligro.
Matod pa ni Gatchalian, nga prayoridad ang kaluwasan sa mga OFW, busa kinahanglan andam ang gobyerno sa bisan unsang posibleng pagpauli sa mga Pilipino nga anaa sa apektadong mga nasud.
Bisan pa sa nagkagrabeng sitwasyon sa Middle East, nanawagan ang mga senador sa mga Pilipino sa apektadong lugar nga dayon makigkontak sa ilang embahada sa Pilipinas aron masiguro ang paspas nga tabang kon gikinahanglan, ug sa gobyerno nga magpabiling andam aron mapanalipdan ang mga Pilipino sa rehiyon.