Nagpasidaan si Senate President Pro Tempore Panfilo “Ping” Lacson batok sa gitawag niini nga mga “homegrown traitors” o mga Pilipinong andam nga ibaligya ang nasud baylo sa personal interest.
Matud ni Lacson, nga sa kapin singkwenta ka tuig nga pagserbisyo sa gobyerno, diin halos katunga ang gigahin sa intelligence work, gawas sa technical intelligence, dakong hulga matud pa ang seguridad sa nasud sa mga indibidwal nga andam ibaligya ang impormasyon ug interes sa Pilipinas.
Dugang pa niini, kasagarang kining gitawag nga “recruitement in place”, kung asa ang gikaingong mismo ang Pilipino ang nahimong traydor batok sa kaugalingong nasud.
Kahinumdoman nga sa pagdungog sa Commission on Appointments kaniadtong Myerkules, Pebrero 4, kusganong gisupak ni Lacson ang sugyot ni Senador Rodante Marcoleta nga itugyan sa Pilipinas ang Kalayaan Island Group kon KIG.
Gitataw sa Senador nga ang pag-surrender sa KIG susama lamang sa pag-surrender dili lamang sa usa ka teritoryo apan lakip na sa bahin sa Luzon o bisan man sa tibuok nasud. Gipasabot ni Lacson nga ang Spratly Islands ang unang na nadiskobrehan ug giangkon sa Filipino nga abogado ug adventurer nga si Tomas Cloma ubos sa prinsipyo nga “res nullius,” diin ang yuta nga walay tag-iya mahimong mapanag-iya ni bisan kinsa nga makadiskubre ug makasakop niini.
Apan, gitugyan ni Cloma kini nga katungod sa gobyerno sa Pilipinas, nga nagsilbi nga usa sa mga legal nga basehan sa nasud sa pag-angkon sa nasangpit nga teritoryo.
Samtang, sa kasamtangan, adunay mga Pilipino nga nagpuyo sa KIG, lungsod sa Palawan, nga padayon nga gidepensahan sa mga Pilipino nga lig-on ang baruganan ug miila sa teritoryo nga iya sa Pilipinas.