Gipadayag ni Panfilo Lacson, Senate President Pro Tempore ug chairperson sa Senate Blue Ribbon Committee, nga magpabiling maampingon ug istrikto ang Senado sa pag-atubang sa gikaingong P805-bilyon nga cash delivery scheme nga giangkon sa 18 ka nagpailang kanhi myembro sa Philippine Marines.
Matud ni Lacson, nga daghang kakulangan sa lohika, hilabi na sa basic mathematics ug logistics, sa mga pamahayag sa maong grupo, hinungdan nga dili pa angay ipatawag gilayon sa pormal nga pagdungog sa komite.
Gipasidan-an usab sa Senador, nga ang imbestigasyon mahimong motultol sa kalibog ug dili seryosong hisgutan kung magsugod kini nga wala’y lig-on ug masaligan nga ebidensya.
Tungod niini, gipasiugda nga mag-una ang lawom nga pag-verify sa background ug kredibilidad sa mga testigo, lakip ang aktwal nga serbisyo sa militar, konsistensya sa testimonya, ug pagpresentar sa tukmang dokumento.
Sa kasamtangan, wala pa matino ang bisan unsang petsa sa pormal nga pagdungog, samtang nagpadayon ang Senado sa preliminaryong pagsusi aron masiguro nga ang proseso magpabiling patas, transparent, ug nakabase sa tinuod nga kamatuoran.