Midepensa si Senator Imee Marcos nga wala siyay gitamakan human niyang girekomenda sa mga kongresista nga ilisan si House Speaker Martin Romualdez imbis nga ipadayon ang impeachment batok ni Vice President Sara Duterte.
Sa usa ka press conference kagahapong adlawa, giingon ni Sen. Imee nga usa lang kini ka suhestiyon ug wala niya kini ginapugos.Gipasabot usab sa Senadora nga iyang gisulti ang maong suhestiyon ngadto sa mga kongresista tungod sa ilang pagpangita ug mga personalidad nga ilang gusto nga ipa-impeach ug giinsistir nga mas maayo nga dili na lang hilabtan ang mga opisyales nga gipili sa katawhan.
Kahinumduman nga kaniadto, girekomenda ni Sen. Marcos ang pagpuli sa kasamtangang Speaker sa House of Representatives samtang siya nibotar nga i-archive ang mga article of impeachment batok ni Vice President Sara Duterte sa Senado niadtong Miyerkules, Agosto 6. Apan, pipila ka House leaders ang mipakli sa maong suhestiyon sa Senadora.
Apil na niini si House Deputy Speaker David Suarez nga miingon nga walay bisan kinsang Senador ang adunay katungod nga mosugo kung kinsa ang angay mahimong leader sa House of Representatives.Matud pa niya, ang maong desisyon nag-agad lamang sa mga miyembro sa kapulungan nga napili sa katawhan.Gidugang pa sa kongresista nga ang lihok ni House Speaker Romualdez legal ug uyon sa konstitusyon ilabi na sa iyang pagpanguna sa pag-transmit sa mga articles of impeachment batok ni VP Sara aron masiguro ang accountability niini.