Gibulgar sa publiko ang pamahayag ni Sen. Imee Marcos kagahapong adlawa human niya akusahan ang iyang igsoon nga si Pangulong Ferdinand Marcos Jr. nga naggamit kuno og ginadili nga droga. Matod ni Sen. Marcos sa ikaduhang adlaw sa anti-corruption rally nga gi-organisa sa Iglesia ni Cristo (INC), nasayud na siya ug ang pamilya sa paggamit sa droga, ug seryoso kini nga butang.
Gibutyag sab sa senadora nga apil ang First Lady Liza Araneta-Marcos sa paggamit og droga. Dugang pa niya, mas grabe ang pagkaadik sa Presidente kay pareho man diay silang magtiayon nga naggamit sa ginadili nga droga. Matod pa sa senadora, gikuyugan pa sa Pangulo ang iyang pamahaw ug marijuana.
Wala pa’y klaro kung adunay ebidensya nga ipagawas si Sen. Marcos aron suportahan ang iyang pamahayag. Sa laing bahin, gitawag ni Palace Press Officer Usec. Claire Castro nga usa ka “desperadong lakang” ang akusasyon ni Sen. Imee batok sa Presidente. Matod niini, imbes mohatag og pasangil, mas angay unta motabang ang senadora sa kampanya sa Pangulo batok sa korapsyon.
Gipasabot pa ni Castro nga walay basehan ang akusasyon, ilabi na kay negatibo ang resulta sa drug test sa Pangulo nga gikumpirma pa kaniadto. Matod pa ni Castro kung tinuod man kini na akusasyon, nganong wala man kini misupak niadtong panahona? Klaro kaayo ang motibo a usa lang ka desperadong lakang,” matod pa ni Castro sa iyang livestream kagahapong adlawa.