Nanawagan si Senador Sherwin Gatchalian og mas agresibong lakang gikan sa kagamhanan aron matubag ang nagkagrabe nga krisis sa enerhiya tungod sa pagsaka sa presyo sa lana sa merkado sa kalibutan.
Partikular nga gihangyo sa senador ang kagamhanan nga makig-pulong sa Iran aron masiguro ang luwas nga pag-agi sa mga oil vessels sa Pilipinas sa Strait of Hormuz—usa ka kritikal nga ruta alang sa suplay sa lana.
Matud pa ni Gatchalian, importante ang dinalian nga high-level diplomatic action aron malikayan ang pagkalangan sa suplay.
Samtang tungod sa pagsaka sa presyo sa LPG, giawhag usab ni Gatchalian ang Department of Energy (DOE) ug Department of Trade and Industry (DTI) nga tun-an ang pagpatuman sa price cap.
Dugang pa niini nga ang LPG usa ka dako nga panginahanglan sa mga panimalay ug gagmay nga negosyo, hinungdan nga ang kalit nga pagsaka niini direktang makaapekto sa panginabuhian ug presyo sa pagkaon.
Samtang nagpahimgno usab ang senador nga kinahanglan ang dungan nga mga lakang—gikan sa diplomasya, lokal nga produksyon, hangtod sa regulasyon sa presyo—aron masiguro ang igong suplay ug mapagaan ang epekto sa krisis sa enerhiya ngadto sa mga Pilipino.