Mipadayag si Senador Erwin Tulfo nga wala kini plano nga modagan sa 2028 national elections, nunot sa sugyot sa “Leni-Erwin” tandem batok kang Bise Presidente Sara Duterte nga mianunsyo na sa pagdagan isip pagka-Presidente.
Matud ni Tulfo, taliwala nga makapadasig ang maong sugyot, wala kini plano nga musulod sa mas taas nga posisyon.
Dugang pa niini, nga wala pa mahuman ang 2025, daghan na kini og giatubang nga pagsaway ug lakip na ang mga kaso, hinungdan nga dili na matud gusto ang pamilya niini og laing kagubot.
Sigon usab ni Sen. Tulfo, nga nagkahinabi na kini sa igsuon nga si Senador Raffy Tulfo nga dili na kini modagan sa mas taas nga posisyon sa 2028 ug ang target mao lamang ang pagpapili pag-usab kon re-election.
Alang kang Tulfo, anaa sa kanhi Bise-Presidente Leni Robredo kung modagan kini pag-usab sa pagka-Presidente ug kung kinsa ang pilion nga running mate.
Gisugyot niini ang pipila ka mga pangalan sama nila ni Senador Bam Aquino ug Senador Risa Hontiveros nga mas haum matud pa nga kandidato nga mahimong running mate ni Robredo.
Hinuon, subling giinsistir ni Tulfo nga sa pagkakaron wala pa kini plano nga modagan ug mas gusto niining likayan ang bag-ong kontrobersiya.