Nag-atubang karon og ethics complaint si Senador Ronald “Bato” Dela Rosa human giingong wala kini motambong sa mga sesyon sa Senado sulod sa kapin tulo ka bulan.
Ang grupong anti-corruption nga “Wag Kang KuCorrupt” maoy nipasaka sa pormal nga reklamo ngadto sa Senate Committee on Ethics and Privileges. Matod sa grupo, ang dugay nga pagliban sa senador giisip nga “dereliction of duty” o pagpasagad sa katungdanan ug pag-abuso sa pagsalig sa katawhan. Gipahayag usab ni kanhi Senador Antonio Trillanes IV nga mopasaka usab siya og susamang reklamo batok kang Dela Rosa.
Katapusang nakit-an si Dela Rosa sa publiko niadtong Nobyembre 2025 pa, taliwala sa mga taho bahin sa imbestigasyon sa International Criminal Court (ICC). Sa iyang mensahe niadtong Enero, niingon ang senador nga maayo ra ang iyang kahimtang ug nagpaabot sa “tinuod nga hustisya.”