Human sa pito ka adlaw nga hugot nga operasyon, pormal na nga gitapos ang search, rescue, ug retrieval operations sa nahitabong pagdahili sa landfill sa Barangay Binaliw, Dakbayan sa Sugbo.
Subay sa katapusang report gikan sa mga otoridad, moabot sa 36 ka indibidwal ang kumpirmadong nakalas human sila natabunan sa toneladang basura ug yuta niadtong Enero 8. Ang maong trahedya giingong nahitabo tungod sa sunod-sunod nga pag-ulan ug paghuyang sa yuta sa maong dapit.
Matud ni Cebu City Councilor Dave Tumulak, bisan pa man sa kakuyaw ug kalisod sa sitwasyon tungod sa methane gas ug dili lig-on nga basura, wala moundang ang mga rescuers hangtud nga narekober ang tanang missing persons.
Sa pagkakaron, nakatutok na ang kagamhanan sa pagtabang sa mga pamilya sa mga biktima ug sa pag-imbestiga sa liability sa operator sa landfill aron masiguro nga dili na mausab ang maong makasubo nga panghitabo.