Nakatakdang mohimo og kasaysayan ang sikat nga P-pop group nga SB19 human sila gianunsyo isip usa sa mga magpasundayag sa Lollapalooza 2026. Sila ang pinakaunang Pinoy group nga makatungtong sa maong bantog nga entablado sa Amerika.
Mikaylap ang maong balita human gipagawas sa mga organizers sa sikat nga music festival ang opisyal nga lineup sa mga artist. Base sa maong listahan, makauban sa SB19 ang dagkong pangalan sa industriya sa musika sama nila ni Charli XCX, Jennie (sa BLACKPINK), Olivia Dean, ug daghan pang uban.
Ang maong music festival ipahigayon didto sa Grant Park, Chicago, USA sugod sa Hulyo 30 hangtod sa Agosto 2, 2026.
Ang Lollapalooza giila nga usa sa pinakadugay ug pinakadakong music festival sa Estados Unidos sukad pa niadtong 1991, diin adunay walo ka stage nga dungan nga paga-gamiton alang sa mga pasundayag.
Gawas niini, excited na usab ang mga “A’TIN” (fans sa SB19) sa umaabot nga sophomore album sa grupo nga nag-ulohan og “Wakas at Simula” nga nakatakdang ipagawas karong Marso 27, 2026, nga pagasundan sa usa ka dako nga concert finale.