Giila ni Atty. Danilo N. Dividina, Election Officer sa Commission on Elections–Malaybalay City, nga adunay dakong implikasyon sa umaabot nga Barangay ug SK Elections karong Nobyembre ang sayong pagdeklara ni Sara Duterte sa iyang kandidatura sa pagka-Presidente sa 2028.
Sumala kaniya, ang maong lakang usa ka political strategy aron masayran dayon kung kinsa ang kaalyado ug dili, ilabi na sa lebel sa barangay nga giisip niyang pundasyon sa nasudnong eleksyon. Giingon niya nga pinaagi sa sayong deklarasyon, masugdan na sa kampo sa bise presidente ang pagpalig-on sa political base gikan sa barangay hangtod sa nasyonal nga lebel.
Gipatin-aw usab ni Dividina nga mahimo kining magamit nga depensa batok sa mga reklamo ug isyu nga ginapaatubang sa bise presidente, lakip ang impeachment ug ubang reklamo, tungod kay mahimo kining ilantaw nga may kalabotan sa politika.