Gituohang depektosong circuit breaker ang hinungdan sa sunog nga miigo sa usa ka sari-sari store sa Purok 3, Tubigon, Maramag, Bukidnon niadtong makalabayng adlaw.
Base sa otoridad, nahitabo ang sunog alas 2:50 sa hapon. Namatikdan sa 56-anyos nga tag-iya sa tindahan nga nagdilaab ang ilang circuit breaker sulod sa ilang panimalay nga duna’y sumpay nga sari-sari store.
Tungod sa kakuyaw, dali nga mikalagiw ang tag-iya uban ang iyang menor-de-edad nga apo ug nangayo og tabang sa mga silingan aron malikayan ang mas dakong trahedya.
Dali usab nga miresponde ang Bureau of Fire Protection (BFP) Maramag alang sa firefighting operations, samtang ang Maramag MPS maoy nanguna sa pagdumala sa trapiko ug pag-secure sa lugar aron malikayan ang bisan unsang kawat. Na-under control ang kalayo alas 3:55 sa hapon, human sa kapin usa ka oras nga operasyon.
Sa pagkakaron, padayon pang gihulat sa mga otoridad ang opisyal nga report gikan sa BFP alang sa kinatibuk-ang danyos ug pinal nga kumpirmasyon sa hinungdan sa sunog.