Gibuweltahan ni House Majority Leader Sandro Marcos ang iyang iyaan nga si Sen. Imee Marcos human kini nagpagawas og pamahayag sa mga pasangil nga walay basehan batok kang Presidente Ferdinand “Bongbong” Marcos Jr., First Lady Liza Araneta-Marcos, ug kaniya mismo sa unang higayon.
Matud ni Sandro nga “dili kini batasan sa usa ka tinuod nga igsuon” ug gitawag niini nga “web of lies” ang mga pamahayag sa senadora nga sa iyang panan-aw nagtinguha lamang sa pagubot sa administrasyon aron makab-ot ang personal ug politikal nga tinguha.
Gibati niini ang kasakit nga makita diin miabot sa maong punto ang iyang iyaan ug gikondena niini ang iresponsableng pasangil nga nagdala lamang og destabilisasyon.
Gisulti usab ni Sandro nga dugay na niyang girespeto ang senadora tungod sa papel niini sa iyang unang tuig sa serbisyo publiko, busa kini ang una ug katapusang higayon nga siya motubag sa maong isyu.
Dugang pa niini nga ang iyang mga ig-agaw, sama nila Borgy, Ilocos Norte Vice Gov. Matthew Marcos Manotoc, ug Atty. Michael Marcos Keon, makapamatood nga walay kamatuoran ang mga pasangil batok kaniya.
Gibutyag usab niini nga sakit sa dughan ang gikaingong “pagbaylo” sa pamilya ilabi nga aduanay kasabutan ang ilang pamilya nga dili dad-on ang sunod nga henerasyon sa mga panag-away sa ilang mga ginikanan, ug nanawagan sa publiko nga magpabilin sa kamatuoran ug dili magpadala sa mga istoryang gibuhat makadaot sa gobyerno.