Gipasalig ni House Majority Leader ug Ilocos Norte Rep. Sandro Marcos nga dili niya babagan ang dagan sa proseso kalabot sa impeachment complaint nga gipasaka batok sa iyang amahan nga si Presidente Ferdinand Marcos Jr.
Matud sa maong magbabalaod, ang pagpaminaw sa mga reklamo batok sa mga impeachable officials usa ka obligasyon base sa gimando sa Konstitusyon.
Gipasabot ni Rep. Marcos nga isip Majority Leader, kinahanglan niyang tumanon ang iyang mandato ug sundon ang legal nga pamaagi sa maong institusyon.
Giklaro pa niini nga dili niya mahimong pugngan o babagan ang bisan unsang reklamo nga i-refer na ngadto sa plenaryo o sa Committee on Justice.
Bisan pa man sa iyang baroganan sa pagsunod sa proseso, gipahayag gihapon ni Rep. Marcos ang iyang lig-on nga pagtuo nga walay nahimong bisan unsang kalapasan ang iyang amahan nga si PBBM.